Gmail-ից այժմ հնարավոր է նամակներ ուղարկել Google+ ցանցի օգտատերերին
Ամսաթիվ
Google ընկերությունը շարունակում է Google+ ցանցին իր ծառայությունների ինտեգրման գործընթացը: Այժմ Gmail-ի օգտատերերը հնարավորություն են ստացել ուղարկել նամակներ Google+ ցանցի օգտատերերին նույնիսկ այն դեպքում, եթե նրանք չգիտեն այդ օգտատերերի էլեկտրոնային փոստերի հասցեները: Այս նոր ֆունկցիան մոտակա օրերի ընթացքում հասանելի կդառնա Gmail-ի բոլոր օգտատերերի համար: Ընդ որում, նրանք կկարողանան տեսնել միայն Google+ ցանցի օգտատիրոջ անունը, իսկ էլ. փոստի հասցեն այդպես էլ չի ցուցադրվի: Սակայն, եթե Google+ ցանցի օգտատերը պատասխանի նամակին, այդ դեպքում նրա էլ. փոստի հասցեն կերևա Gmail-ի օգտատիրոջ մոտ:
Եթե նամակ ուղարկողը չկա Google+ ցանցի օգտատիրոջ շրջանակների մեջ (ընկերների խումբ), ապա ստացած նամակները կտեղադրվեն «Սոցիալական ցանցեր» բաժնում: Ընդ որում նշվում է, որ այդպիսի նամակներ ուղարկողները կարող են նոր խոսակցություն սկսել միայն այն դեպքում, եթե նրանք ստանան նախորդ նամակի պատասխանը կամ կավելացվեն նամակ ստացողի ընկերների շրջանակում:
Իսկ եթե Google+ ցանցի օգտատերը չի ցանկանում անծանոթ մարդկանցից նամակներ ստանալ, նա կարող է Gmail-ի կարգավորումներում անջատել այս ֆունկցիան:
